رزق الله!

بتتذكروا أناني الحليب القزاز, يلي بدها فتاحة كازوز؟؟
بتتذكروا الكازوز شو كان بارد وطيب لما يكون في شوب و عجقة و غبرا...
بتتذكروا شبابيك السيارة القديمة كيف بتنفتح و بتتسكر يدويا؟؟
بتتذكروا أغطية الأدنين الصوف لما كنا نطلع على بلودان كل ما شفنا بنشرة الأخبار الجوية أنه في ( تساقط ثلوج على المرتفعات)
بتتذكروا أشرطة الفيديو الكبيرة قديش كانو يتشربكوا.
بتتذكروا الكنكنة و الدفا لما يمدوا السجاد على أول الشتوية؟؟
بتتذكروا لما كان بابا كتير طويل و جدو طويل كتير و طانت ماجدة عملاقة و الكيت كات الملفوفة بسولوفان من مضايا كتير طيبة؟
بتتذكروا صوت الرجلين و هنن حافيين عالبلاط لما نركض بالكوليدور قبل ما ينمد السجاد؟
بتتذكروا لما كنا فهمانين كلشي بس عاملين حالنا ما منفهم شي.
بتتذكروا لما كنا كبار, كتير كبار بس الكل بيقولوا عنا صغار؟