ريحة الأرض

ليش هيك صايرة ريحة الأرض بالشام؟ عم تتناثر أجزاء منا، كل يوم في أجزاء عم توقع وتغرق بالأرض، بتشوفها بحافة الشارع، تحت الرصيف... عم يكنسها الزبال من دون ما يعرف ولا نحنا نعرف، ضو الشارع ما بيعكسها ولا ضو السيارات أو ضو الإشارات... بتفيق الصبح وكل يوم بتحس في جزء منك راح، ضاع... وبتحاول تستعيد التحكم بحياتك وبتساوي قهوة، بس بعد ما يروح تأثير الكافيين الظهر ويروح تأثيرالإندورفين لما ترجع من المظاهرة ويروح تأثيرالفودكا بعد ما تكون صرخت عالسكيتي وما حدا فهم، بتنام وبتفيق وبتلاقي ريحة الأرض مختلفة، كل هالأجزاء يلي عم يكنسها الزبال كل يوم الصبح...